Albisteak

"Arratiako Kalenturak" Ipuin Erotikoen Lehiaketa martxan

Asteartea, 2019-09-17

Literatur lehiaketen mapan erotismoak leku berezia izan zuen urte luzez, Basauriko eta Dimako deialdiei esker. Hari horretatik tiraka, Txalaparta argitaletxeak saritutako ipuinekin hainbat liburu plazaratu izan zituen (azkena argazkian doan Esku hori! bilduma, 2012an). Aurten Zertu Kultur Elkarteak, Igorreko Udalaren laguntzarekin, Arratiako Kalenturak Ipuin Erotikoen Lehiaketa martxan ipini du. Lehiaketak Basauri eta Dimako ipuin erotikoen lehiaketen oinorde eta segida izan gura du. Lanak azaroaren 15era arte bidali ahal izango dira.

Ez adiorik, Jon

Osteguna, 2019-09-12

Lur jota geratu gara gaur goizeko albistearekin: Jon Barberena zendu da. Idazlea, bertsolaria, iritzi emale zorrotza. Iaz kolaboratzaile izan genuen Hitzen Uberanen, eskerturik jaso ohi genituen bere kezka sozialak, elkartasunerako joera, edozein gai jorratzeko pasioa. Albiste honetan gogora ekarri nahi izan ditugu bere hitzak. Esker onez, adiorik ez, Jon.

Babel errezitaldi musikatua eskainiko dute Bilbon eta Gasteizen

Asteazkena, 2019-09-11

Patxi Zubizarretaren azken nobela oinarri hartuta –Julien Vinsonen hegaldia–, errezitaldi musikatua eskainiko dute idazleak berak, Maddi Oihenartek eta Pello Ramirezek. Datorren astean, hilaren 19an, Bilbon izango dira, eta, bi aste barru, hilaren 26an, Gasteizen.

Martxan da Joseba Jaka beka

Asteartea, 2019-09-10

Elkar Fundazioak Joseba Jaka bekaren edizio berri bat abiatu du. Aurtengoan, narratibako lanak sarituko dituzte: nobelak edo ipuin laburrak. Lanak abenduaren 31ra arte aurkez daitezke, eta datorren urteko apirilean emango da ezagutzera irabazlearen izena. Albiste honetan bildu ditugu bekaren oinarriak.

Eider Perez-en lehen kolaborazioa "Sinadurak" atalean

Astelehena, 2019-09-09

Eider Perez-ek hilean behin kolaborazioa egingo du Hitzen Uberanen, Sinadurak sekzioko "sormen lanak" atalean. Eider Perez hainbat saltsatan ezagutu dugu orain arte, hitzaren artean murgildurik sarri; besteak beste, "Andre eta jabe" errezitaldi musikatuan, eta "Hitzetik hortzera" saioan aurkezle. Jarraian irakurri dezakezue lehen testua: E-1 Erregistroa. Gustua baduzue, hilean behin irakurri ahal izango dizkiozue horrelako "erregistroak". On egin!!!